- 706 -

1447. Jan. 9.

Vnsern frundlichen grus zuuor. Ersamen, weizen hirren vnd lieben frunde, als von der Behemischen zamenunge wegin neste an ewir weisheit vorschrebin, hattin wir vnsern dyner, der do vmme wol becant ist vff worhaftige spee auszgericht, der ist gewest eyn virtel wegis von Fredeland zcu eyme seyner frunde, der do leichte mit andirn Slosshirren in dem frawentsatschin (?) rawbe vnd neme mete gewest ist vnd der hot en vndirricht, das die selbige zammenunge, dy do beyenandir gewest sey zcu retin seyen eyn yderman vf seynen ort, ydoch werden sie kurcz wedir beyenandir seyen vnd eyne andir starke reyte ansloen, wenne sie vf diszmol kowme LXX pferde gehabit han, wo hin dy seyen sulle, moge her zo eygentlich noch nicht gewissen, zo balde sie zusamen sich geschicken, zo welle her ouch do bey seyn vnd genczlich irfaren, wo hin sich gebin werden vnd im globit, das in getrawer geheyme warhafticlich zcu vorbotin vns dornach zcuwarnen, zo schier vns denne sulche verbotunge zcuqweme, wollin wir ewer erbarkeyt von stadan wedir zcu wissen tuen ane allis vorczihen, auch zo hat vns derselbige durch vnsern dyner lossen sagen, das dy Thaborer bynn achttagn czwir vor Prage gewest seyen, wenne das dy Prager kegin en aus geczpgen wurden vnd dy Thaborer wurden en zcu stark vnd sie alle (?) wedir yngetrebin vnd weiden gerne widir eyn feld vnd czoge machin, wenn das sich dy Prager in dy stete besant sulden habin vnd meynen en mit gotis hulffe eyn sulchs zcu weren. Got torstige sie, das icht dy letczten den irsten erger wurden, hyrnoch habit euch zcuhaldin. Gegebin am montage Jucundi anno etc. XLVII°.
Ratmanne zcum Goltberge.

Mit Rückaufschrift an den liegnitzer Rath.

Orig. Kgl. Bibl. z. Berl. Ms. Boruss. f. 568. No. 99.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866